Vorferð Sóta 2023

Nú fer að líða að vorferðinni okkar sem mun verða 2.-4. júní.

Við munum gista á Skógarhólum og ríða út þaðan, þar eru 5 herbergi sem hvert tekur 6-7 manns í gistingu.

Við leggjum af stað á föstudagskvöldið og sameinumst í kerrur.

Þegar komið verður á Skógarhóla er hægt að fara í reiðtúr upp að Svartagili á eigin vegum á föstudagskvöldinu en á laugardeginum ríðum við saman Skógarkotshringinn og svo á sunnudaginn ríðum við gömlu þjóðleiðina áleiðis til Reykjavíkur. Við gerum ráð fyrir að einn hestur í góðri þjálfun ráði vel við þessa reið.

Kostnaðurinn verður 15 þús fyrir mann og 1 hest en innifalið er gisting í tvær nætur fyrir mann og hest, kvöldmatur á laugardeginum og ótakmarkað kaffi svo lengi sem við nennum að hella uppá!

Það sem er ekki innifalið er allur matur nema kvöldmatur á laugardeginum. Ef þú færð far fyrir hestinn þinn þá gerum við ráð fyrir að þú gerir það upp við bílstjórann.

Á laugardagskvöld er svo kvöldvaka og við ætlum að biðja hvert hesthús um að koma með skemmtiatriði á kvöldvökuna, enda er Hestamannafélagið Sóti pakkfullt af skemmtilegu og hæfileikaríku fólki!

Við biðjum alla um að skrá sig fyrir 25. maí!  Sjá viðburð á Facebook hér

Ég vona að við getum fjölmennt og skemmt okkur saman í frábærri ferð!
Fyrir hönd ferða- og skemmtinefndar Sóta, Hildur Sigurgríms