Veik fyrir móálóttu

Lóa skoraði síðast á Hildi sem er leigjandi í húsi nr 1 og lætur sig ekki muna um að koma alla leið úr Vogahverfinu í Reykjavik til að ríða út með Sóta félögum!  

Sp.  Hvað verður þú með á húsi í vetur? Hvaða hesta?
Sv: Ég verð með aðalreiðhestinn minn, Botníu frá Staðarhrauni. Ég fékk hana í hestakaupum við Brand bónda á Staðarhrauni þegar meri sem ég átti reyndist þannig í tamningu að hún endaði í tunnunni. Brandi fannst það leiðinlegt og bauð mér Botníu í hestakaupum og það eru bestu skipti sem ég hef gert!

Sp: Stefnir þú á að fara á námskeið eða sýnikennslur?
Sv:  Já, ég þarf endilega að fara á námskeið! Ég tók svo seint inn að ég missti af byrjuninni á námskeiðinu hjá Atla en kannski kemst ég að hjá honum ef það verður framhald, eða þá hjá Sigrúnu Sig.
 
Sp:  Eru einhverjar hestaferðir á plani næsta sumar?
Sv: Já, ég fer í það minnsta eina ferð á Löngufjörur og svo í vorferð Sóta sem verður algjör toppferð með toppfólki!
 
Sp:  En á að halda einhverjum merum, ef já, ertu búin að ákveða undir hvaða hest(a)?
Sv: Nei, ég fékk tvö folöld seinasta sumar þannig að það dugir mér í bili. Folarnir mínir eru undan Hlyn frá Haukatungu og Mýrkjartan frá Akranesi.
 
Sp:  Áttu uppáhalds hestalit?
Sv: Ég er alltaf svolítið veik fyrir álóttu, sérstaklega móálóttu. Ég er með þá kenningu að liturinn á barnahesti fólks verði að uppáhaldslit og ég byrjaði einmitt á móálóttum hesti frá Ragnheiði Sigurgríms, frænku minni í Keldnakoti.
 
Sp:  Er eitthvað sérstakt sem þú vilt koma á framfæri?
Sv: Hestamennskan er frábært sport, það getur hver stundað hana á sínum forsendum og það eru endalaus tækifæri til að bæta sig sem reiðmann. Fólkið í kringum hestamennskuna er svo rúsínan í pylsuendanum, þar hef ég eignast marga góða vini og hlakka til að eignast fleiri!   
 
Sp:  Hvern viltu skora á að vera næsti spjallari?
Sv: Ég skora á Gulla ofurafa 😊