Sóta Spjallið - Nýtt!

Guðmundur og Þula á góðum sumardegi

Nýtt á Sótavefnum! 
Við ætlum að forvitnast aðeins hvað Sótafélagar stefna á í vetur, hvaða hesta þau eru með á húsi ásamt fleiru. 
Vonandi taka félagar vel í þessa nýjung og svari fljótt og vel þegar á þá er skorað.

Fyrstur til að ríða á vaðið er ferðagarpurinn Guðmundur Ragnarsson, bústjóri í nr 6. 

Sp.  Hvað verður þú með á húsi í vetur? Hvaða hesta?

Sv. Ég er með svo marga leigjendur að ég kem engu inn.  Jú, grín,  Þula, alræmda litla drottningin með stóra karakterinn verður inni.  Flaumur, stóri jarpi Skálmarssonurinn minn verður inni. Hann er reyndar að fara í hendur nýrra eigenda, Soffía og Beggi taka við honum, en hann verður auðvitað bara áfram í húsinu. Síðan kom Sóldís, mósótt á fimmta vetur úr tamningu frá Sanne í Skálakoti. Hún lofar góðu. Fer samt aftur út seinnipart vetrar í hvíld. Inn koma í staðinn Draumur, bleikur foli undan Aljóni frá Nýja- Bæ og Iða, skjótt undan Atlasi frá Hjallanesi. Birna Filippía mun sjá um að þjálfa Draum og Iðu fyrir mig í vetur. 

Sp: Stefnir þú á að fara á námskeið eða sýnikennslur?
Sv: Já, ég stefni á að fara á námskeið með vorinu, helst vildi ég fá Atla Guðmunds ef hann verður í boði á svæðinu.   

Sp:  Eru einhverjar hestaferðir á plani næsta sumar?
Sv:  Það á eftir að skýrast, vonandi kemst ég í Sótaferðina sem er á döfinni að fara í vor. Síðan fer ég eitthvað með Halla Aikman, en það á eftir að skýrast. Annað er svosem ekki á döfinni, en maður veit aldrei.   

Sp:  En á að halda einhverjum merum, ef já, ertu búin að ákveða undir hvaða hest(a)?
Sv:  Ég ætla ekkert að halda merum í sumar, vonandi er ég hættur því!

Sp:  Áttu uppáhalds hestalit?
Sv: Ég er alltaf veikur fyrir rauðjörpum hrossum og vindóttum. Minna spenntur fyrir brúnu og rauðu, nema þá hrafnsvörtu og sótrauðu.

Sp:    Er eitthvað sérstakt sem þú vilt koma á framfæri?
Sv:  Sóti er og hefur lengi verið, flottasta félag sem ég veit um.  Það sem við höfum áorkað saman í þessu fámenna samfélagi, fyrst og fremst með samheldni og samvinnu er magnað.  Framtíðin er björt ef við munum að maður er manns gaman!


Guðmundi eru þökkuð góð (en ekki snögg......hahahaha!) svör en hann skorar á Ara að vera næsti spjallari.