Sækjum þekkingu og þjálfun á sem flestum stöðum

Askur frá Álftanesi, fyrsta ræktunin hjá Tómasi. Undan Stiku og Vökli frá Efri-Brú.

Sigurjón skoraði á hinn unga manninn í hverfinu okkar, Tómas.  Tómas er ættaður frá hinu þekkta ræktunarbúi, Efri -Brú, og er oftast með hesta úr þeirri ræktun. 

Sp.  Hvaða hesta ert þú með á húsi í vetur?  
Sv: Ég er með þá félaga og frændur Rit frá Efri-Brú og Vaðal frá Efri-Brú inni í vetur.

Sp: Stefnir þú á að fara á námskeið eða sýnikennslur?
Sv:  

Maður er alltaf að reyna að bæta við sig einhverri þekkingu og reynslu. Ég tók þá skyndiákvörðun um daginn að skrá mig á námskeið í vinnu við hendi og það gengur vel. En annars hefur það reynst mér best að sækja einkatíma til þess að takast á við þau verkefni sem ég er að glíma við hverju sinni.
 
Sp:  Eru einhverjar hestaferðir á plani næsta sumar?
Sv: Það er ekkert komið á blað ennþá en ég á það til að taka ákvarðanir um slíkt með mjög stuttum fyrirvara.
 
Sp:  En á að halda einhverjum merum, ef já, ertu búin að ákveða undir hvaða hest(a)?
Sv: Það er ekkert ákveðið enn en þessi mál eru í vinnslu.

Sp:  Áttu uppáhalds hestalit?
Sv: Ég hugsa að móálóttur sé efstur en þó finnst mér skipta mestu máli að það sé fjölbreytni og að það séu ekki heilu stóðin sem eru öll eins á litinn

Sp:  Er eitthvað sérstakt sem þú vilt koma á framfæri?
Sv: Sækjum þekkingu og þjálfun á sem flestum stöðum, en munum að mynda okkur okkar eigin skoðanir og aðferðir við okkar þjálfun.

Sp:  Hvern viltu skora á að vera næsti spjallari?
Sv: Ég held að það sé komið að formanninum okkar honum Jörundi.