Puntur fagnar 30. vetrum

Elsti hesturinn í Sóta hverfinu er án efa Puntur frá Neðri-Hrepp (IS1991135616) en hann fagnar 30 vetra afmæli nú í vor!  Eigandi hans er Anna Margrét Ingólfsdóttir sem segir hann nokkuð hressan miðað við aldur en ekki jafn búttaðan og áður en hann hefur yfirleitt komið vel undan vetri. Sæunn Ósk, ung systurdóttir Önnu hefur fengið að nota hann og Anna sjálf einnig farið einstaka sinnum á bak í vetur.   En hver er saga Punts?  Gefum Önnu Margréti orðið: 

,,Ég er 33 ára, verð 34 þann 12. maí nk. og fékk Punt í fermingargjöf frá foreldrum mínum eftir að hafa farið í ferð norður til Hólmgeirs frænda míns til að velja hest sem ég ætlaði að kaupa fyrir fermingarpeningana.

Ég fann líka þennan fína hest sem mér leist svo vel á og fór í langan reiðtúr með stóru hestastóði inn eftir Eyjafirði. Svo á fermingardaginn þegar ég kom heim úr kirkjunni stóð Puntur minn á pallinum, en foreldrar mínir lögðu til að í tilefni fermingardagsins færum við aðra leið inn og þar blasti Puntur við, nýkembdur og með slaufu í faxinu. " 

,, Næstum 3 ár eru liðin frá því hann örmagnaðist í skurði hér á Álftanesi og tók viku að geta tekist að standa á eigin fótum, það var í september 2017. Enduðum á því að byggja í kringum hann og setja breiða strappa í kringum hann. Að lokum gat hann staðið sjálfur og jafnaði sig furðufljótt. Þessa viku vöktum við alveg yfir honum og fengum lánaðan pallbílinn hans Krumma í Sóta sem er með fínu húsi aftaná og ég og Birnir Orri maðurinn minn skiptumst á að vaka yfir honum og annað okkar svaf svo í hýsinu til skiptis. Það munaði öllu að hafa haft aðstöðu þar og kann ég Krumma miklar þakkir fyrir það."

Við óskum Punti til hamingju með árin þrjátíu og þökkum Önnu Margréti kærlega fyrir sögurnar og myndirnar.  Það er greinilegt að Önnu Margréti og fjölskyldunni þykir vænt um hestinn.  Það eru eflaust ekki margir sem myndu eyða svo miklum tíma og peningum að bjarga 27.vetra hesti þegar hann nær örmagnaðist útí haga.   Puntur er heppinn!