Miklar framfarir - viðtal við Trausta Þór

Um síðastliðna helgi var lokahnykkurinn hjá nemendum á reiðnámskeiði hjá Trausta Þór en þau hafa hist eina helgi í mánuði frá því í febrúar.  Vefstjóri Sóta hitti Trausta og fékk að senda honum nokkrar spurningar. 
​
Hvernig líkar þér við nýju aðstöðuna í Sóta? 
"Hjá Sóta hefur verið byggð reiðhöll við hlið hringvallarins og skeiðbrautarinnar. Þetta þrennt, auk "litla félagsheimilisins" myndar skemmtilega og mjög hagnýta heild til námskeiða-halds, móta og annarrar venjulegrar félags starfsemi. Ég tel að reiðhöllin eigi eftir að reynast Hestamannafélaginu Sóta og félögum mjög áríðandi. 

Allt félagssrtarf mun eflast og munu verða miklar framfarir í reiðmennsku á svæðinu vegna aðstöðunnar. Það kæmi mér ekki á óvart að þessi uppbygging muni draga að fleiri félagsmenn, félagið muni stækka vegna möguleikanna til þess að kenna börnum og ungmennum hestamennsku. Til hamingju Sóti."

Hvernig hafa nemendur staðið sig í vetur?  Eru framfarir hjá hestum og/eða knöpum? 
"Ég var mjög ánægður með nemendur mína í vetur og tel að mikar framfarir hafi orðið hjá flestum. Ég segi oft að mitt hlutverk sem reiðkennara sé að hjálpa fólki að bæta þekkingu sína og færni í hestamennsku, til þess að bæta líf hestanna. Þegar knapar taka framförum, verða hestarnir betri."

Hvernig líst þér á hestakostinn? 
"Hestar flestra nemenda minna í Sóta eru mjög góðir og taka framförum með "betri reimennsku" Að sjálfsögðu er oft hestakosturinn misjafn en þegar framfarir verða,... jafnast það aðeins. Innan-um í þessum hópi eru nokkrir mjög flinkir reimenn, með frábæra hesta."

Myndir þú segja að framtíðin væri björt fyrir Sótafélaga eða ertu með ábendingar um hvernig við getum þróað okkur áfram? 
"Þar sem áhugi er nægur, þar er björt framtíð. Leggið áherslu á fræðslu og námskeiða-hald og starfið mun auðgast."

Er eitthvað sem þú vilt segja að lokum? 
"Það verður spennandi fyrir mig að fylgjast með framhaldinu hjá Sóta, hvort sem ég muni koma eitthvað að því eða ekki. Ég hlakka til að fylgjast með "knöpunum mínum"

Myndir: 
​Hópmyndin er af kennara og knöpum 
Trausti Þór á hestinum Óm frá Kirkjuferjuhjáleigu (sem er nú í Svíþjóð)