,,Hestaferðir skemmtilegastar"

Erna Björk skoraði síðast á Soffíu sem er einnig ein af "fermingamæðrunum" í Sóta.   Hún er sjálf komin á kafi í hestamennskuna og stefnir á að koma allri fjölskyldunni í Sóta.

Sp.  Hvaða hesta verður þú með á húsi í vetur?  
Sv: Ég er með hann Flaum frá Langholti í húsi og hann er einmitt frá honum Guðmundi Ragnars, stór og stæðilegur hestur sem ég er að vona að nýtist undir eiginmanninn þegar mér tekst að draga hann almennilega inn í þetta skemmtilega hestasamfélag. Svo er hann Dökkvi frá Dalsmynni, öðlingurinn sem hjálpaði mér að "læra á hest" í húsi líka og er í láni.

Sp: Stefnir þú á að fara á námskeið eða sýnikennslur?
Sv: Ég var að vona að geta gert eitthvað af því í vetur en mér sýnist það tækifæri vera úr sögunni í bili og ég stefni ótrauð á að fara á námskeið næsta vetur.
 
Sp:  Fórstu í einhverjar hestaferðir í sumar?
Sv: Ég fór í hestaferðina með Sótafélögum á Þingvelli og var það stórskemmtilegt eins og áður. Ég gæti hugsað mér að vera bara í hestaferðum á sumrin. Þetta er það alskemmtilegasta sem ég hef gert.
 
Sp:  En hélstu einhverjum merum, ef já, undir hvaða hest(a)?
Sv:  Ég er svoddan ungbarn í hestamennsku að ég hef ekki komist svo lengra en að hugsa það, en við mæðgur höfum nú rætt að halda Grafík undir einhvern flottan hest.
 
Sp:  Áttu uppáhalds hestalit?
Sv: Í rauninni ekki, mér finnst fallegast þegar hópur hesta er sem fjölbreyttastur á litinn. Ég hef t.d. alltaf jafngaman af því að horfa á Dökkva skipta litum yfir árið. Ég játa þó að jörpu hestarnir okkar Sóldísar heilla mig og á sama tíma eru skjóttir hestar líka alltaf mjög spennandi.
 
Sp:  Er eitthvað sérstakt sem þú vilt koma á framfæri?
Sv: Ég er afskaplega þakklát fyrir að hafa kynnst þessu samfélagi hestamanna hér á Álftanesi og fengið að taka þátt í starfinu. Sótasamfélagið er alveg einstakt og þakkar vert hversu vel allir hafa tekið okkur nýgræðingunum vel.
 
Sp:  Hvern viltu skora á að vera næsti spjallari?
Sv: Ég ætla að skora á hana Sóldísi og leyfa henni að svara fyrir sig, þótt við séum algjörar samlokur hérna í hesthúsinu..