Hestaferð

​Eins og sjá má á dagskrá ferða-og skemmtinefnar í maí er áætluð hestaferð fyrir Sótafélaga 16-17 maí.   Ákveðið hefur verið að kýla á ferðina en með breyttu sniði vegna Covid19.  Við munum t.d. ekki gista saman heldur er reiknað með að hver gisti heima hjá sér og við verðum að passa 2metra bilið meðan á ferð stendur.  
​Dagskráin er sirka svona: 

​Laugardagur 16 maí: 
10:00.  Kerruflutningur á hrossum frá Álftanesi í Hafnarfjörð.  Það væri gott ef allir kerrueigendur myndu fylla sínar kerrur og ef þáttaka er góð þurfa nokkrir að fara tvær ferðir.   Þegar flutningi er lokið leggjum við af stað frá Hafnarfirði.  
Riðið verður uppá Kjalarnes þar sem hrossin verða eftir í Vonarholti (hjá mömmu hans Ara)
Við keyrum til baka á Álftanes, grillum saman í félagsheimili og tökum nokkur létt lög (en verðum að passa 2m bilið!)
 
Sunnudagur 17 maí:
10:00.  Brottför frá Álftanesi og keyrum í Vonarholt
Ríðum svo AÐRA LEIÐ til baka í Hafnarfjörð og þaðan verður kerruflutningur aftur á Álftanes. Áætlað er að öll hross verði komin aftur á Álftanes um kl. 17:00
 

• Reiðleiðirnar eru um 22/27 km hvora leið og mælum við með a.m.k. 2 hrossum á mann.
• Frábærar reiðgötur!  Og leiðin er um græna dali, hraunbreiður,  framhjá vötnum, yfir ár, meðfram strandlengju og golfvelli og gegnum lúpinubreiður.  Mjög skemmtileg leið sem kemur á óvart.  Það þarf ekki að leita langt yfir skammt. 
• Bíll verður með í för og þeir sem eiga ekki 2 hesta get skipst á að vera í bílnum og teyma hvor fyrir annan.
• Þetta er teymingaferð og gott að fara að æfa sig að geta teymt hesta í reið
• Hver sér um sitt eigið nesti yfir daginn (hægt að geyma í bílnum sem fylgir) og hver sér um sig fyrir grillið í Sótaheimilinu
• Því mun þessi ferð ekki kosta krónu!  
• ATH!  Ef veðurútlit er slæmt (t.d. rigning og rok) verður ferðinni frestað eða aflýst
• Þetta er ferð fyrir alla vana knapa en rétt er að taka fram að ferða-og skemmtinefnd tekur enga ábyrgð ef einhver dettur af baki.
• Við munum að sjálfsögðu fylgja reglum sóttvarnalæknis og ef eitthvað breytist þá verður tekið tillit til þess.

 
Þetta verður geggjuð ferð og við vonumst til að sjá ALLA Sótafélaga taka þátt og hafa gaman!  Fyrir keppnisfólkið er þetta frábær leið að koma hrossum í dúndrandi form fyrir vor/sumar mót! 
 
Þið megið endilega láta okkur vita sem fyrst ef stefnið á að koma með
 
Með sumarkveðju
Hin öfluga Ferða-og skemmtinefnd