Það er gaman að vera í Sóta

Jörundur skoraði síðast á Maríu sem kom með hvelli inn í Sóta með fjölskylduna fyrir nokkrum árum.  Það sem byrjaði með einum hesti í leiguplássi er nú orðið að fullu hesthúsi með öllu tilheyrandi og fyrsti vísir af hrossarækt á leiðinni.

Sp.  Hvaða hesta ert þú með á húsi í vetur?  
Sv: Við fjölskyldan vorum með fjóra hesta á húsi í vetur: Strimil frá Hafsteinsstöðum sem er hesturinn minn, Gissur hvíta frá Kirkjubæ hans Þorsteins, Hvítserk frá Forsæti II sem Hugrún Gyða hefur séð um í vetur og svo höfðingjann Glæsi frá Skrúð.

Sp: Fórstu á einhvern námskeið eða sýnikennslu í vetur eða stefnir þú á næsta vetur?
Sv:   Já í vetur fór ég á reiðnámskeið hjá Sigrúnu Sigurðardóttur og svo fór ég á námskeið hjá Hrafnhildi Helgu Guðmundsdóttur í að vinna í hendi. Næsta vetur mun ég pottþétt fara á fleiri námskeið.

Sp:  Eru einhverjar hestaferðir á plani næsta sumar?
Sv: Vonandi kemst ég á bak í sumar. Ég tognaði illa á ökkla fyrir stuttu og kemst ekki á bak í bili en ég krossa fingur og óska þess að ég komist á bak sem fyrst.
 
Sp:  En á að halda einhverjum merum, ef já, ertu búin að ákveða undir hvaða hest(a)?
Sv: Merin hennar Hugrúnar Gyðu, hún Hekla frá Ási II, á von á sér í lok júní en hún fór undir Þráinn frá Flagbjarnarholti í fyrrasumar. Frekari fjölgun er ekki á dagskrá að sinni.
 
Sp:  Áttu uppáhalds hestalit?
Sv: Nei eiginlega ekki, þeir eru svo margir fallegir.
 
Sp:  Er eitthvað sérstakt sem þú vilt koma á framfæri?
Sv: Það er gaman að vera í Sóta. Það er ótrúlegt hvað þessu litla félagi hefur tekist að afreka.
 
Sp:  Hvern viltu skora á að vera næsti spjallari?
Sv: Ég skora á mæðgurnar Vigdísi og Elfi.